ភ្នំពេញ៖ ក្រសួងអប់រំយុវជន និងកីឡា នឹងចាប់ផ្តើមដំណើរការស្រង់បូកពិន្ទុសន្លឹកកិច្ចការប្រឡងនៅថ្ងៃទី១៦ ខែធ្នូ ឆ្នាំ២០២២ ក្រោយបញ្ចប់ទាំងស្រុងនូវដំណើរការកំណែសន្លឹកកិច្ចការបេក្ខជនប្រឡងសញ្ញាបត្រមធ្យមសិក្សាទុតិយភូមិរួចមក។

ដំណើរការកំណែសន្លឹកកិច្ចការប្រឡងបាក់ឌុបចាប់ពីថ្ងៃទី១២ ដល់ថ្ងៃទី១៤ ខែធ្នូ ឆ្នាំ២០២២។

អ្នកនាំពាក្យក្រសួងអប់រំយុវជន និងកីឡា លោក រស់ សុវាចា ថាក្រោយបញ្ចប់ដំណើរការកំណែ ប្រធានអនុប្រធានមណ្ឌលទាំងអស់ បានដឹកសន្លឹក MCS និងឯកសារផ្សេងៗមករក្សាទុកនៅនាយកដ្ឋានកិច្ចការប្រឡងដើម្បីចាប់ផ្ដើមរៀបចំដំណើរការស្រង់ បូកពិន្ទុដោយកុំព្យូទ័រ។

លោកបានបន្តឱ្យដឹងថា នៅថ្ងៃទី១៥ ខែធ្នូ ឆ្នាំ២០២២នេះ នឹងមានការប្រជុំណែនាំគណៈកម្មការស្រង់បូកពិន្ទុដោយកុំព្យូទ័រ និង គណៈកម្មការផ្ទៀងផ្ទាត់ ចាប់ពីថ្ងៃទី១៦ ដល់ថ្ងៃទី២៥ ខែធ្នូ ឆ្នាំ២០២២ និងថ្ងៃទី២៦ ខែធ្នូ ឆ្នាំ២០២២ ថ្នាក់ដឹកនាំក្រសួងអប់រំនឹងប្រជុំសម្រេចលទ្ធផលជូនបេក្ខជនតាមការគ្រោងទុក។

នាពេលរសៀល ថ្ងៃទី២៧ ខែធ្នូ ឆ្នាំ២០២២ នឹងមានការប្រកាសលទ្ធផលប្រឡងសម្រាប់នៅ រាជធានីភ្នំពេញ និងខេត្តកណ្តាល និង នៅថ្ងៃទី២៨ ខែធ្នូ ឆ្នាំ២០២២ សម្រាប់ខេត្តផ្សេងៗនៅទូទាំងប្រទេស។

សូមរំលឹកដែលថា ក្រសួងអប់រំយុវជននិងកីឡាបានរៀបចំប្រឡងសញ្ញាបត្របាក់ឌុបនៅថ្ងៃទី៥ និងទី៦ធ្នូ ឆ្នាំ២០២២ ដោយមានបេក្ខជនចូលរួមប្រឡងសរុបចំនួន ១២៨ ១៣៥នាក់ ស្រី ៦៨៧៧១នាក់ មាន ២២១មណ្ឌល (៥១៧៤បន្ទប់) និងមានការចូលរួមដោយគណៈមេប្រយោគ និងគណៈកម្មការដែលពាក់ព័ន្ធចូលរួមក្នុងដំណើរនោះប្រឡងសរុបចំនួន ១៧២៤០នាក់ និង អ្នកចូលរួមសង្កេតការណ៍ពីអង្គភាពប្រឆាំងអំពើពុករលួយចំនួន ៣៥០នាក់និងអ្នកសង្កេតការណ៍រាជធានីខេត្តចំនួន ២ ៧០០នាក់៕